Çfarë mund të bëjë një grua dyzetecavjeçare pa fëmijë? E mërzitur me jetën e saj, e bllokuar, autorja e këtij libri, Mia Kankimaki, braktis punën, shet apartamentin dhe vendos të udhëtojë nëpër botë, duke ndjekur shtigjet e femrave eksploruese dhe artiste, të cilat e kanë frymëzuar prej kohësh. Ajo fluturon për në Tanzani e më pas për në Kenia, për të parë me sytë e saj ku ka jetuar më 1920, e famshmja Karen Bliksen, autorja e librit të mirënjohur “Jashtë Afrikës”. Në Japoni, Mia përpiqet të kapërcejë gjendjen e trishtuar teksa kryen kërkime për artisten bashkëkohore me famë botërore, Jajoi Kusama. Në Itali, Mia i shpenzon ditët në kërkim të punëve artistike të grave të harruara të periudhës së Rilindjes, dhe më në fund arrin të gjejë heroinat e saj në portretet e Sofonisba Anguisolës, Lavinia Fontanës dhe Artemisia Xhentileskit. Nëse këto gra qenë në gjendje të ishin të suksesshme qindra vite më parë, përse të mos jetë edhe Mia?
Mia Kankimaki është autorja e dy librave bestseller të cilët ndërthurin udhëtimet, kujtimet, biografitë dhe historitë e grave. Pasi përfitoi diplomën për master në fushën e letërsisë krahasuese në Universitetin e Helsinkit dhe punoi me pasion në fushën e botimeve, në vitin 2010 ajo e la punën dhe udhëtoi në Japoni për të shkruar librin e saj të parë. Libri i dytë, “Gratë që mendoj gjatë natës”, u frymëzua nga udhëtimet e saj, në gjurmët e personazheve femërore frymëzuese, në Tanzani, Kenia, Itali dhe Japoni. Aktualisht jeton në Helsinki, Finlandë, sa herë që nuk është duke udhëtuar për projektin e saj të ardhshëm.
